كتب محمد سامى عن تجربته فى الثانوية العامة، وقدم نصائحه السحرية الـ 20 للتفوق والحصول على أعلى مجموع:
(1) – ابدء دروسك من شهر 8 متبدأش من قبل كده .
(2) – تاخد في الماده مع مدرس واحد فقط .
(3) – الدروس الخصوصيه افضل من المراكز .
(4) – لو هتاخد في مراكز يبقي تركز انك تروح بدري وتقعد في الاول وتفصل نفسك عن اللي حواليك .
(5) – متاخدش مع المدرس علي اساس اسمه ( عفريت الفيزياء ) ( دبابه الكيمياء ) لما يكون بيدي 6000 طالب اكيد هيطلع من عنده 2 جايبين 99% امر عادي ولا علشان ابن خالتك هيخد عنده – ممكن مدرس مش مشهور اوي بس شاطر وبيراعي ضميره.
(6) – جرب المدرس 3 حصص علي الاقل وشوف طريقه شرحه مناسبه ليك وبتفهم منه وألا لأ مش اقل من كده – لو حسيت انك مش فاهم منه حاجه ومش بيوصلك المعلومه غيره اما مش من اول حصة.
(7) – الدروس في 3 ثانوي مش زي اعدادي – يعني مش هتلاقي انتا قاعد مع 3 والمدرس بيديك الدرس وعارفك بالاسم لا انت ممكن تحضر مع 300 طالب فلازم تعمل حسابك انك مش هتكون ( النجم الساطع ) زي ما كان بيحصل قبل كده .
(8) – ظبط مواعيد دروسك من البدايه علي حسب ايام الاسبوع ومواعيد الدروس وبعضها البعض .
(9) – تاخد في الماده مع مدرس واحد فقط ( تاني ) – هتقولي بتكررها ليها علشان متغلطش غلطه شكري (واحد صاحبي متعرفوش ) كان بياخد في الماده مع 2 و 3 مدرسين لدرجه انه ماكنش بيدخل البيت كان فاكر ان كده شطاره وتثبيت للمعلومات .
(10) – سنه الثانويه العامه 10 شهور – بتبدء من شهر 8 وبتنتهي في شهر 5 – قسم السنه لكذا مرحله علشان تبقي عارف في كل مرحله هتعمل ايه .
(11) – بلاش تعلي النار قوي من البدايه علشان الانبوبه متخلصش – متبدأش السنة سخن اوي وبتذاكر في ال 24 ساعه 24 ساعه علشان متجيش علي شهر 2 تلاقي نفسك زهقت ومليت وتعبت وتقع مره واحده – خليك ماشي بسرعه متوسطة، لا تنام ولا تعلي اوعي بس المهم انك تكون متحفز دايما ومصحصح .
(12) – خلص مذاكرتك اول بأول، اوعي اوعي اوعي تراكم حاجه عليك، خليك خفيف دايما كده، تيجي من الدرس يا في نفس اليوم او تاني يوم بالكتير تكون مذاكر اللي انتى اخدته – اول باول هتلاقي نفسك مرتاح نفسيا دايما ومش مضغوط و مطمئن من جواك .
(13) – كل شهر ادي لنفس يومين تلاته – تعمل فيهم مراجعه علي اللي فات – علشان تفوق نفسك وبالبلدي تلضم اللي فات باللي جاي علشان متفصلش .
(14) – خليك مع ربنا دايما، التزم بصلاتك في مواعيدها، الصلاة هتخليك مطمئن وهادي ومستريح ومش متوتر .
(15) – رضاء والدك ووالدتك عليك مفعوله سحر، ممكن تبقي الدنيا متشقلبه معاك وبدعوه واحده منهم كل حاجه تستقر وتتظبط، فبقدر الامكان برهم وخليهم راضيين عنك.
(16) – انت مش في سجن – يعني جو شيل التلفزيون وقطع الانترنت ده مش هيوصل بيك لحاجه الا انك هتكون مضغوط نفسيا ومخنوق طول الوقت – انت مش صغير انت كبير وعندك اراده وهدف، يعني عارف انها سنه مهمه ولازم تدي فيها مجهود اكثر من اي سنه تانيه بس كمان لازم يكون في وقت للترفيه حتي لو محدود بس مطلوب.
(17) – متقولش انا عاوز اجيب مجموع كذا علشان انا عاوز ادخل كليه كذا – لا كان فيه وخلص – انت تبص علي الـ 99% انا مليش دعوة بالكلية دلوقتي انا ليا دعوة بالكام % وابص لل 99% علشان يوم ما انزل ابقي 97% ابقي 98% اما لو قولت انا عاوز اجيب 97% هجيب 95% وهكذا – ماتركزش في الكلية ركز في المجموع بس.
(18) – كتر شراء الكتب الخارجيه امر مزعج وبيعملك دوشه وتحس انك مش عارف تفتح ايه ولا ايه ولا ايه – ماتفتكرش ان ديه شطارة، هات اللي المدرس بتاعك ينصحك بيه فقط، وركز فيه مع كتاب المدرسة والنماذج بتاعت الوزارة.
(19) – الغي كلمه ( توتر ) من قاموسك – لو اتوترت حتي لو كنت طول عمرك من الاوائل هتتكعبل في السنه ديه وهتقع علي وشك – انا مش هقولك زي باقي الناس هيا سنه زي اي سنه – لا هيا سنه فريده وبيتحدد عليها مستقبل – علشان كده عاوزه اهتمام اما هيا مش بعبع – قلقها بيجي من التوتر و المعتقدات الي تربينا عليها من الصغر – اما هيا سنه لو فوقت ليها كويس وصحصحت ليها وقسمت السنه مراحل زي ما قولت هتلاقي نفسك من الاوائل بأذن الله .
(20) – هات نتيجة حائط وعلقها في غرفتك، وكل يوم بيومه تشطب علي اليوم علشان تحس ان لليوم ده قيمة ميعديش كده بالساهل، وتجيب ورق نوت كده تسميه ( الجدول اليومي ) كل يوم أول لما تصحي الصبح بعد لما تصلي وتفطر تكتب فيه انتا يومك هيمشي ازاي وهيبقي فيه ايه – هتروح درس ايه – هتذاكر ايه النهارده – هتروح فين كده.
واخيرا ..تذكروا ان ” لِكُلِّ مُجْتَهِدٍ نَصِيبٌ “
