نصيحة طبيب: إبعد عن “‎SAMSUNG”..علشان ما ترميش فلوسك على الأرض


شكا عدد من المواطنين من مشكلات وعيوب واجهتهم عندما قاموا بشراء وإستخدام عدداً من الأجهزة التابعة لشركة “سامسونج”.

أعرب الكثيرون منهم عبر الصفحة الرسمية “Samsung Egypt” على موقع التواصل الإجتماعى “فيس بوك” عن إستيائهم من سوء أداء هذه الأجهزة، وكذلك من تواصل خدمة العملاء وخدمات ما بعد البيع لمحاولة إصلاح هذه المشكلات.

يحكى طبيب قصة معاناته التى مر بها قائلاً: “اشتريت جهاز تكييف سامسونج المثلث الجديد بتاريخ ١٥-٦-٢٠١٥ من شركة (…) علشان أركبه في العيادة، وأول يوم ركب فيه شغلته فصل بعد ١٠ دقائق، وجالي حاجة اسمها ( E4 -22 ) وده خطأ يدل على إن فيه مشكلة في الوحدة الخارجية للجهاز !!

اتصلت بشركة (….) إللي اشتريت منهم الجهاز فبعتوا مندوب الصيانة، وقالي المشكلة إن الفريون ناقص وإحنا زودناه ودا بيحصل أحيانا مع الأجهزة الجديدة ودلوقتي حضرتك هوه  شغال !!

يا دوب مشيوا وجيت أشغله حصلت نفس المشكلة والجهاز فصل !!

كلمتهم تاني فبعتوا واحد يشوف الكهرباء بعدها بكام يوم، وقالي الكهرباء مفيش فيها مشكلة أبداً !!

كلمتهم تالت قالوا لي: “اتصل بشركة Samsung Egypt عشان لو فيه مشكلة هما هيتعاملوا معاها ..ومن هنا بدأت المعاناااااة …”.

ويضيف الطبيب: “بعتولي فني يتبع شركة الضمان ” …….” عشان ياخد تقرير بالجهاز، ولما جه قالي لاااا المشكلة من الكهرباء ولازم تظبطها !!

قولتله: المشكلة مش من الكهرباء، دا مشكلة من الجهاز نفسه وأنا متأكد من كدا.

قالي: حضرتك بس هات Stabilizer عشان يضبط الكهرباء وهو هيشتغل .

قولتله: على فكرة هأجيبه ومش هيشتغل.

وبالفعل اشتريت الجهاز والمشكلة فضلت موجودة، بل كمان غيرت فردة الكهرباء اللي جاية للشقة وما فيش فايدة، وللعلم بثمن جهاز الـ Stabilizer كنت اشتريت جهاز تكييف جديد !!

اتصلت تاني وطلبت منهم تغيير الجهاز، وقدموا طلب بكدا، وبعدها بكام يوم اترفض الطلب لأنهم بيقولوا إن تقرير الفني بيقول إنها من الكهرباء، ومش عارف كهرباء إيه اللي تخلي الجهاز عند ٣٧ درجة، والجهاز يفصل كل ١٠ دقايق..ما هم لو باعتين فني فاهم هيعرف الخطأ ده سببه إيه.

ويستكمل الطبيب: للأسف بأسمع تريقة من أي حد داخل العيادة من قبيل: (إيه دا..دا الجو برا أحلى من هنا ألف مرة )، ( إنت يا دكتور شاري تكييف بيجيب هواء سخن ما تطفيه أحسن ) .. وهكذا .

وأضاف: “تقريبا يوميا باتصل بيهم والرد الوحيد إللي بأسمعه: (إحنا قدمنا تقرير جديد وهنرد على حضرتك خلال ٢٤ – ٤٨ ساعة) “.

وأختتم الطبيب تغريدته قائلاً: “نصيحة ياريت محدش يشتري الجهاز ده خالص”، وعلشان ما ترميش فلوسك على الأرض ابعد عن ‎SAMSUNG”.

www.ict-misr.com
x

‎قد يُعجبك أيضاً

تهنئة بمناسبة ذكرى المولد النبوي الشريف

www.ict-misr.com

error: Alert: Content is protected !!