“المنصهر” ..مواليد الثمانينات لايعلمون عنه شئ، ذلك الذى كانت كهرباء كافة المنازل تعمل به، عبارة عن وصلة من الخزف بها “صباعين” من النحاس يصل بينهما سلك رفيع؛ من المفترض أن يكون هذا السلك مصنوع من الرصاص، حتى ينصهر عند حدوث اى ماس كهربائي او اى مشكلة في تحدث في كهرباء المنازل حيث يمثل صمام الأمان من حدوث الحرائق لاقدر الله.
هذا المنصهر يعرف اليوم بإسم الاتوماتيك، الموجود في لوحة العداد الكهربائي.
طبعاً المصري الاصيل معروف بقوته وجبروته، ومشهور ايضا إلى جانب ذلك بالفكاكة ..!!!
الفكاكة دى بقى خلته يغير سلك الرصاص اللى فى المنصهر بسلك نحاس.. علشان حاجتين: الاولى عدم توفر سلك الرصاص دائما، والثانية علشان النحاس بيستحمل الحرارة، ومش بيتقطع عند حدوث ماس ..!!!!
والفكاكة دى برضو هى اللى تفتق عنها مخ المصري وخلته يحط مياه ساخنة تحت انبوبة البوتاجاز علشان الغاز اللى جواها يسخن ويقدر يستغل آخر نقطة فيها ..!!
والفكاكة بالمناسبة كانت بتخلى الصنايعى اللى بيركب أنبوبة البوتاجاز بيلف حواليها بعود كبريت مشتعل .. علشان يتأكد إن مفيهاش تسريب، والله اعلم لو فيها تسريب وألتحم بنار الكبريت كان هيبقى الوضع إزاى ..!!
وبرضو الفكاكة المصرية هى اللى خلقت ١٠٠ مليون ناقد رياضي، و١٠٠ مليون محللين سياسيين، وزيهم فى الفن والتاريخ والجغرافيا..وطبعا ١٠٠ مليون مفتى دينى بيحلل ويحرم بكل سهولة وأريحية..!!
وحالياً ..الفكاكة برضو ألهمت المصري إنه يقلع الكمامة اللى بتحميه من فيروس كورونا، ويمسكها فى إيده علشان يسلم على صاحبه ويبوسه وياخده بالاحضان، وبعدين يلبسها تانى، كان الفيروس مخدش باله..!!
وللأسف الفكاكة دى فى أحيان كتيرة بتكون قاتلة، زى بالضبط اللى حصل من ايام فى شقة الشرابية، وتسبب إغلاق فتحات التهوية والمدخنة الخاصة بالغاز في وفاة ٧ اشخاص مختنقين، فى حادثة وجعت القلوب. #منتخب_مصر
“لكل داء دواء يستطاب به .. إلا “الفكاكة” .. أعيت من يداويها..أتمنى ان يصل الوعى لدى المواطنين إلى درجة الثقة في المتخصصين، هم أدرى منا فيما يخص عملهم، وبلاش تشغيل الدماغ والفكاكة الله يسعدكم.
