ict-misr.com/21982/%d8%a2%d9%89-%d8%b3%d9%89-%d8%aa%d9%89-4/" rel="attachment wp-att-21983">ict-misr.com/wp-content/uploads/2021/11/آى-سى-تى-3-scaled.jpg" alt="8" width="869" height="73" />
فاكرين أغنية المطرب الشعبى حكيم؛ اللى بتقول فى مطلعها (ولا 1 ولا 100 ولا 1500) ..الأغنية دى لخصت حكاية الأرقام فى لهجة المصريين.
للأرقام في اللهجة العامية المصرية إستخدامات مختلفة ومحددة جداً، علي سبيل المثال: (٦٠)..يستخدم الرقم (٦٠) فقط وحصرياً دوناً عن باقي الأرقام في الشتيمة، زي (ابن “٦٠” تيت)..ومفيش حاجة ابدا اسمها (ابن “٥٠”) ولا (ابن “٧٠”)..هما ٦٠ فقط ..!!
أما لو حد بشع جداً بقي وعايزين نضاعفله الشتيمة أضعاف كتيرة، فابنعمل ايه؟ مش بنقول رقم أكبر من ٦٠ وخلاص، لأ احنا بنجيب الـ٦٠ بتاعتنا عادي ونضربها في ٧٠..!!، بتبقى مثلاً: (ابن ٦٠X٧٠)..!!
ويستخدم رقم (٦٠) بردو لوصف أسوأ مكان او وجهة.. مثل: (أهو غار في “٦٠” داهية)، وعمر ما حد غار في ٨٠ أو 90 داهية مثلا ابدا..ماحصلتش..!!
كذلك يستخدم الرقم (٣٠) حصرياً لوصف شخص أو شيء عديم المنفعة، فمثلاً يقال: ( ده واد مالهوش أى “٣٠” لزمة)، أو (روحت خروجة مالهاش “٣٠” لزمة)..والملفت للنظر، ان مفيش اي حاجة في الدنيا لها ٣٠ لزمة اصلا.!!
وتستخدم في العامية الرقم 100 لوصف الحالة الجيدة..فيقال: (انا تمام يا معلم الحمدلله وكله “١٠٠ ١٠٠”)، أو (لا آكل ايه تاني؟ انا كده “١٠٠ ١٠٠”).
أما (١٠ علي ١٠) فتستخدم لوصف جودة الاشياء..فمثلاً: (شوية شاي”١٠ علي ١٠”).
أما الرقم 1000 فيستخدم تحديدا في مناسبات ثابتة..مثلاً في المباركة: (١٠٠٠ مبروك).. ومفيش ١٠٠ مبروك مثلا..وطبعا لما نحب نشكر حد اوي، بنشكره(١٠٠٠ شكر) بالعدد..!!
وفي الاحتفال الحماسي..(١٠٠٠ نهار ابيض)..بردو مفيش (١٠ نهارات بيض) مثلا، ولا حتي(20 نهار ابيض).. هما ألف في كل حتة.!!
وفي الترحاب..(١٠٠٠خطوة عزيزة)..ودي بالنسبة لي جملة مبهمة جداً، يعني (دي خطوة عزيزة) بمعني انها زيارة نادرة الحدوث، إنما (١٠٠٠ خطوة عزيزة) يعني ألف زيارة نادرة الحدوث؟.. ازاااي..؟؟؟
يستخدم رقم (٧) في وصف حاجة غريبة جدا الحقيقة، وهي اللوصة أو الانهاك المحير، مثل: (انا دوخت الـ ٧ دوخات)، كما يستخدم رقم (٧) للتعبير عن النوم العميق، مثل: (مش هايرد عليك، ده شكله رايح في “سابع” نومة)، علي اساس انه لو في سادس نومة كان قام عادي وكده.!!
الشاي بيبقي (٥٠)..خمسينة، أي 50% من الحجم المعتاد الكوباية، يعنى نص كوباية بالمللي..!!
الرقم (٥) فى مصر عبارة عن وحدة قياس فضفاضة جدا، وتعني في العامية المصرية (خمس دقايق)، وتستخدم في وصف الانتظار احيانا..استناني (٥)..!!
أو في وصف حوار سريع..(هاكلمك..(٥) بس اشرحلك)..أو لوصف الاستراحة: (اقعد (٥) بس خد نفسك).
أما في وصف الوقت.. الثانية بتبقي (واحدة): (ثانية “واحدة” بس)، بس الدقيقة تحتمل (١) و(٢) و(٣)..(دقيقة “واحدة” وهابقي معاك)..أو..(إديني “دقيقتين” وهأبقي معاك)..أو:(انا هاشرحلك كل حاجة في “٣” دقايق)
وأطول مدة زمنية في الكون هي (الساعتين الاتنين): (قعدت تحكي لي “ساعتين”)، بينما أقصر كلام هو اللي يتقال في كلمتين اتنين، (هما “كلمتين” ورد غطاهم).
الشخص المحتاس ده بقي اللي تلاقيه قاعد (يضرب أخماس في أسداس)، ودي بالنسبة لي عملية معقدة جدا..!!
واللي مالوش عند حد حاجة محدش يقدر يقول له (تلت التلاتة كام؟)، اللي هو (١) عادي..!!
منقول
